Monday, August 31, 2009

കുമ്പസാരം


വഴിയരികിലെ പാപങ്ങളോട്‌
വാവിട്ട്‌ മാപ്പപേക്ഷിയ്ക്കുകയാണ്‌

കാണിച്ച അപരിചിതത്വത്തിനും
കാർക്കിച്ചുതുപ്പിയതിനും
കല്ലെറിഞ്ഞതിനും......

പിഴ
എന്റെ പിഴ
എന്റെ വലിയ പിഴ

Saturday, May 30, 2009

പ്രണയം

സയ്‌നൈഡ്‌പോലെ
ഒരൊറ്റത്തുള്ളി
മറ്റൊരുലോകം

Monday, May 18, 2009

ശാസ്ത്രം

സപ്തവര്‍ണ്ണവൃത്തം


കറക്കിവിടുമ്പോ‍ൾ
വെള്ള

കറക്കത്തിനിടയിലിവിടം വിടുമ്പോള്‍
പുതപ്പിച്ചുകിടത്തേണ്ടതിന്റെ
വര്‍ണ്ണശാസ്ത്രം
വേറൊന്നാകുമോ?

Tuesday, May 12, 2009

ഉണ്മ

അഞ്ചാറെണ്ണംകഴിഞ്ഞാല്‍
കരച്ചിലടക്കാനാവുന്നില്ല

എന്തിനെന്നറിയാതെ
ഉള്ളിന്റെയുള്ളില്‍നിന്നും
ഒരുരുള്‍പൊട്ടല്‍
യുക്തിഭദ്രമായും
രഹിതമായും
ഈ പ്രതിഭാസത്തെ
വിശകലനം ചെയ്തു

ഒരുത്തരവും കിട്ടിയില്ല

ഒരു പക്ഷേ
ബോധം മറയുമ്പോഴാണോ
സുഹൃത്തേ
ഉണ്മ തെളിയുക?

















































Saturday, April 25, 2009

പത്താംദ്വാരം

കാണുന്നിടത്തും
കാണാത്തിടത്തും
ദ്വാരങ്ങള്‍:

വേണ്ടാത്തതൊക്കെയും
ചീറ്റിക്കളയാനും
തുപ്പാനും
തൂറാനും
മുള്ളാനും.........

പിന്നെന്തേ
ഓര്‍മ്മക്കുടലിന്റെയറ്റത്തുമാത്രമൊരു
ചെറുദ്വാരമിടാന്‍
തമ്പുരാനോര്‍ക്കാതെപോയത്‌?

Monday, March 30, 2009

ത്‌ഫൂ.....

മുഖത്തുതന്നെ

ലക്ഷ്യബോധമുള്ള
ലെബനീസ്‌പെണ്ണ്‌

എന്നാലും
മാതൃഭാഷയില്‍
മൊഴിഞ്ഞതിത്രവ്യക്തമായവളെങ്ങിനെ......

ഭൂമിയിലെയാണുങ്ങള്‍ക്കെല്ലാം
ഒരൊറ്റയക്ഷരമാലയായിരിയ്ക്കുമോ?

Wednesday, March 18, 2009

ശീലക്കുട

കാലങ്ങളായി
കൈമാറിവന്നതാണ്‌.

വെയിലും മഴയും
നിഷിദ്ധമെന്നപോലെ,
അപ്പന്റെ ചൂരലിന്റെ
ചൂടാറാത്തയോര്‍മ്മകള്‍വിടര്‍ന്നപോലെ,
കുഞ്ഞുമോഹങ്ങളെയതിന്റെ
ആസ്മത്തണലിന്നതിരുകളിലടക്കി
ഒഴിയാബാധയായി
നിവര്‍ന്നുപടര്‍ന്നുമുരണ്ടുകാലന്‍കുട.


ശ്വാസംമുട്ടിപ്പിടഞ്ഞിരിയ്ക്കെ
നിയന്ത്രണംവിട്ടോരുമാത്രയില്‍
കുടയൊടിച്ച്‌
തോട്ടിലെറിഞ്ഞൊരൊറ്റയോട്ടം:
ജ്വലിയ്ക്കുന്ന പകലിനുമീതേ
കോരിച്ചൊരിയുന്ന മഴയ്ക്കുകുറുകെ
ഹര്‍ഷോന്മാദഹൃദയവുമായി......

തിരിഞ്ഞുനോക്കിയിട്ടില്ല
പിന്നീടൊരിയ്ക്കലും;
'അപ്പന്റെ ശീലക്കുടയൊടിച്ചവനെ'ന്ന
മുരളലും മോങ്ങലും
പലര്‍ക്കുമിപ്പോഴുമുണ്ടെങ്കിലും.........