മധുരം

ഓഷ്ഠാധരങ്ങളിൽ
മധുവൂറുന്നു

മിണ്ടാട്ടമിതുവരെ
മാതൃമൊഴിയിലായിരുന്നല്ലോ

ശാപദ്വീപ്‌

ഭൂപടത്തിൽ
വൻകരകൾ
അടയാളപ്പെടുത്തേണ്ട
നേരത്ത്‌

പിൻബഞ്ചിലിരുന്ന്
ടീച്ചറുടെ ഭൂമിശാസ്ത്രം
ഉറക്കെ
ഹൃദ്യസ്ഥമാക്കിയതിനാലാവുമോ

ഹൃദയഭൂപടങ്ങളിൽ
ഈ കൊച്ചുദ്വീപ്‌
ആരും
അടയാളപ്പെടുത്താതെപ്പോയത്‌?

ചാറ്റൽമഴ

കിഴവൻ മുഖംമിനുക്കി
കിടക്കയിലേയ്ക്കിഴയുന്നു
കിഴവിയോടൊപ്പം

നടുമുറ്റത്ത്‌
നനുത്ത ചാറ്റൽ

വിശ്വാസം, അതല്ലല്ലോ എല്ലാം

നീട്ടിവിളിച്ചപ്പോൾ കരുതി
തീറ്റതരാനായിരിയ്ക്കുമെന്ന്

കയറിട്ട്‌ വലിച്ചപ്പോൾ
തൊഴുത്തിലേയ്ക്കാണെന്നും

ചാരിവച്ച പലകയിലൂടെ
ലോറിയിലേയ്ക്ക്‌ തള്ളിയപ്പോൾ
ഒരു പുൽത്തകിടി സ്വപ്നം കണ്ടു

യാത്ര ഞെരുങ്ങി
പതയൊഴുകിയപ്പോൾ
ഏതോയൊരു പുഴയോരവും

വണ്ടിയിൽ നിന്ന്
വലിച്ചിട്ടപ്പോൾ തോന്നി
കൈയ്യബദ്ധമായിരിയ്ക്കുമെന്ന്

അതോർത്ത്‌
നിന്റെ ചങ്കുരുകുകയാണെന്ന്

ഇപ്പോളീമരമുട്ടിയിൽ വച്ച്‌
കഴുത്തിനുനേരെ
കത്തിയുയർത്തിനിൽക്കുമ്പോൾ

കഴുത്തിലെ
കുരുക്കറുക്കാനായിരിയ്ക്കുമെന്ന്
കരുതിക്കോട്ടെ ഞാൻ......

നിന്നെക്കുറിച്ചൊരിക്കലും
മറിച്ച്‌ ചിന്തിയ്ക്കാനെനിക്കാകില്ലെന്ന്
നിനക്ക്‌ നന്നായറിയാമല്ലോ

മാനംനോക്കിക്കിടക്കുമ്പോൾ

നീ
പറക്കുകയായിരുന്നു
ഉള്ളിൽ

അകലെ
ഒറ്റയ്ക്ക്‌
പറക്കുന്ന പക്ഷിയോട്‌

നിന്നോടുള്ള
പ്രേമം
പാടിയിരുന്നെങ്കിൽ

ആകാശച്ചില്ലകളുപേക്ഷിച്ച്‌
അതെന്നിലൊരു
കൂടുകെട്ടിയേനേ

ജ്ഞാനോദയം

എനിയ്ക്കും
ബുദ്ധനുമിടയിലെ
ഒരാൽമരയകലം

ഭൂമി

ഓരോ ജന്മവും
ഒരു പ്രണയലേഖനം

സ്വർഗ്ഗം
ഭൂമിയ്ക്കയക്കുന്നത്‌

വായിച്ചുകഴിഞ്ഞാൽ
മാറോടമർത്തികിടക്കും

അടുത്തതിനായി
ആർത്തിയോടെ കാത്തിരിയ്ക്കും

മിടിപ്പ്‌

മുഷ്ടിയോളംപോലെയൊന്നിൽ
പ്രപഞ്ചത്തോളംപോലെയൊന്നിന്റെ
നിലയ്ക്കാത്ത മിടിപ്പ്‌

എന്റെ കുഞ്ഞുപേടകം

മുലഗുരുത്വം

മാനത്തേയ്ക്കെറിഞ്ഞ കല്ല്
താഴെ
ഭൂമിയുടെ മാറിൽ
വീഴുന്നു;



ഭൂഗുരുത്വമെന്ന്
ശാസ്ത്രം .



എങ്കിൽ ,



മുഖത്തേയ്ക്കെറിഞ്ഞ നോട്ടം
താഴെ
മുലകളിൽ
വീഴുമ്പോൾ,

എന്നെ
ഉണ്ടക്കണ്ണുരുട്ടുന്നത്‌
തികച്ചും
അശാസ്ത്രീയമല്ലേ?

നാലുമണിപ്പൂക്കൾ

നാലുമണിയ്ക്ക്‌
കൂട്ടമണിയടിയ്ക്കും

കുട്ടികൾ കൂട്ടത്തോടെ
പുറത്തേയ്ക്ക്‌

പുസ്തകങ്ങളടുക്കുന്നതായി
നടിച്ച്‌

നീയും
ഞാനും

മറിയാമ്മേടത്തി
താഴുമായെത്തുംമുമ്പേ

ഇറുക്കിപിടിച്ചുള്ള
നിന്റെയുമ്മകൾ

താഴിന്റേയുംചാവികളുടേയും
കിലുക്കമെത്തുമ്പോൾ

ഒരോട്ടമാണ്‌

വലതുവശത്തെ ജാനാലചാടി
നീയും

9-B യുടെ പിൻവാതിലിലൂടെ
ഞാനും

ഓടിയോടി
വീട്ടിലെത്തും

മുഖം
കിതച്ചുതുടുത്തിരിയ്ക്കും

കവിളിലെ വിയർപ്പുതുള്ളിയിലൊലിച്ച്‌
ചുണ്ടിലേയ്ക്കുമ്മകളൊഴുകുന്നുണ്ടാകും

ഓടിക്കിതച്ചതെന്നു കരുതി
ഓടരുതെന്നമ്മ മുഖം തുടയ്ക്കും

എത്ര തുടച്ചിട്ടും

അന്ന്

നീ വിതച്ച
ഉമ്മകളൊക്കെയും

ഇന്നും

അമ്മുവിന്റെ സ്കൂളിലെ
അവസാന കൂട്ടമണിയിൽ

നാലുമണിപ്പൂക്കളായി
വിടരുന്നുണ്ട്‌

കുമ്പസാരം

വഴിയരികിലെ പാപങ്ങളോട്‌

വാവിട്ട്‌ മാപ്പപേക്ഷിയ്ക്കുകയാണ്‌

കാണിച്ച അപരിചിതത്വത്തിനും

കാർക്കിച്ചുതുപ്പിയതിനും

കല്ലെറിഞ്ഞതിനും......

പിഴ

എന്റെ പിഴ

എന്റെ വലിയ പിഴ

പ്രണയം

സയ്‌നൈഡ്‌പോലെ
ഒരൊറ്റത്തുള്ളി
മറ്റൊരുലോകം

ശാസ്ത്രം

സപ്തവര്‍ണ്ണവൃത്തം

കറക്കിവിടുമ്പോ‍ൾ
വെള്ള

കറക്കത്തിനിടയിലിവിടം വിടുമ്പോള്‍
പുതപ്പിച്ചുകിടത്തേണ്ടതിന്റെ
വര്‍ണ്ണശാസ്ത്രം
വേറൊന്നാകുമോ?

ഉണ്മ

അഞ്ചാറെണ്ണംകഴിഞ്ഞാല്‍

കരച്ചിലടക്കാനാവുന്നില്ല

എന്തിനെന്നറിയാതെ

ഉള്ളിന്റെയുള്ളില്‍നിന്നും

ഒരുരുള്‍പൊട്ടല്‍

യുക്തിഭദ്രമായും
രഹിതമായും
ഈ പ്രതിഭാസത്തെ
വിശകലനം ചെയ്തു

ഒരുത്തരവും കിട്ടിയില്ല

ഒരു പക്ഷേ
ബോധം മറയുമ്പോഴാണോ
സുഹൃത്തേ
ഉണ്മ തെളിയുക?

പത്താംദ്വാരം

കാണുന്നിടത്തും
കാണാത്തിടത്തും
ദ്വാരങ്ങള്‍:

വേണ്ടാത്തതൊക്കെയും
ചീറ്റിക്കളയാനും
തുപ്പാനും
തൂറാനും
മുള്ളാനും.........

പിന്നെന്തേ
ഓര്‍മ്മക്കുടലിന്റെയറ്റത്തുമാത്രമൊരു
ചെറുദ്വാരമിടാന്‍
തമ്പുരാനോര്‍ക്കാതെപോയത്‌?

ത്‌ഫൂ.....

മുഖത്തുതന്നെ

ലക്ഷ്യബോധമുള്ള
ലെബനീസ്‌പെണ്ണ്‌

എന്നാലും
മാതൃഭാഷയില്‍
മൊഴിഞ്ഞതിത്രവ്യക്തമായവളെങ്ങിനെ......

ഭൂമിയിലെയാണുങ്ങള്‍ക്കെല്ലാം
ഒരൊറ്റയക്ഷരമാലയായിരിയ്ക്കുമോ?

ശീലക്കുട

കാലങ്ങളായി
കൈമാറിവന്നതാണ്‌.

വെയിലും മഴയും
നിഷിദ്ധമെന്നപോലെ,
അപ്പന്റെ ചൂരലിന്റെ
ചൂടാറാത്തയോര്‍മ്മകള്‍വിടര്‍ന്നപോലെ,
കുഞ്ഞുമോഹങ്ങളെയതിന്റെ
ആസ്മത്തണലിന്നതിരുകളിലടക്കി
ഒഴിയാബാധയായി
നിവര്‍ന്നുപടര്‍ന്നുമുരണ്ടുകാലന്‍കുട.

ശ്വാസംമുട്ടിപ്പിടഞ്ഞിരിയ്ക്കെ
നിയന്ത്രണംവിട്ടോരുമാത്രയില്‍
കുടയൊടിച്ച്‌
തോട്ടിലെറിഞ്ഞൊരൊറ്റയോട്ടം:
ജ്വലിയ്ക്കുന്ന പകലിനുമീതേ
കോരിച്ചൊരിയുന്ന മഴയ്ക്കുകുറുകെ
ഹര്‍ഷോന്മാദഹൃദയവുമായി......

തിരിഞ്ഞുനോക്കിയിട്ടില്ല
പിന്നീടൊരിയ്ക്കലും;
'അപ്പന്റെ ശീലക്കുടയൊടിച്ചവനെ'ന്ന
മുരളലും മോങ്ങലും
പലര്‍ക്കുമിപ്പോഴുമുണ്ടെങ്കിലും.........

ദിവ്യൗഷധം

മുട്ടയോ
കോഴിയോ.........?

അമ്മയുമച്ഛനും
മാഷും
പള്ളീലച്ചനും ചൊടിച്ചു:
'വലുതാകുമ്പോളറിയാം'

ഒന്നുമാത്രമറിഞ്ഞു:

ചില ചോദ്യങ്ങള്‍
ദിവ്യൗഷധങ്ങളാണ്‌
ഒരിയ്ക്കലും
വയസ്സറിയിക്കില്ല

യാത്രാസുഖം

തൂങ്ങിക്കിടന്നുള്ള യാത്രയാണ്‌

പിടിവിട്ടുവീഴുമോ
മഴ നനയ്ക്കുമോ
കാലുവഴുതുമോ
മതിലുചാടിയയുദ്യാ‍നക്കൊമ്പുകൾ
മുഖത്തൊലി കവരുമോ
തല പോസ്റ്റിലിടിച്ചുചിതറുമോ
തൂങ്ങുകയാണ്‌
കുറെ കറുത്തസസ്തനികള്‍
മസ്തിഷ്കച്ചില്ലകളില്‍

ഇറങ്ങേണ്ടയിടമാകുമുടനെയെങ്കിലും
അറിഞ്ഞില്ലൊന്നുമാത്രമിതുവരേയും

തൂങ്ങിയാടുന്നസസ്തനികള്‍ക്കിടയില്‍
ഒളിച്ചിരിയ്ക്കയാവാം.